Arvin 的快意感想
望一望錶板個里數錶，發現架Punto就快行夠50000km，心想，或者都係一個好時候去分享吓作為快意人的感受。
買架 Punto
之前, 自己用緊架棍仔Echo. 當時用
$79900出咗平生等一部新車,
感覺好開心. 架車俾我用咗兩年,
行咗接近 60000km. 自己對架車並沒有特別感覺,
女朋友就唔多鍾意個外型, 只記得兩年來只要不斷入油同換偈油,
架車就會行會走. 但Toyota 就係Toyota,
唔好理佢外表同內涵, 易手價真係無敵,
亦係唯一令我對Echo 感到滿意同難忘的事.
賣車後, 一次俾我無意中見到一本便利個賣車廣告入面, 有一行小字, 話有部 01年的MK2 Punto speedgear出售, 心入面覺得奇怪, 明明快意喺香港已經無代理, 點解會有部新款Punto 流落異鄉? 同女朋友商量後, 決定打電話約睇車. 見到真車後, 先被個顏色吸引, 覺得好特別. 如果部車係銀色, 我諗我唔會買得咁爽快. 當時其實可以考慮埋HGT, 但因為要將就個得自動波牌的女朋友, 即係變咗無得選擇; 仲有就係知道當時的快意俱樂部入面, 全部都係單門的棍波車, 如果我個架係五門, 重要係自動波, 咁咪重冷門到冷門!
朋友問我點解咁勇,
敢買部出名多問題的意大利車代步? 其實買個時並無認真考慮維修問題,
只見到喺歐洲同澳洲成日見到呢款車,
就連祖國都有快意賣, 心諗無理由日日都要整車卦!
買佢的第二個原因係知架車慳油,
喺日本仔網頁入面,
見到部車仲慳油過 Echo! 咁堅,
對我呢個跑開終極大長途的車主嚟講,
極之吸引. 如是者俾錢落定等出車,
期望參加第一次的快意叙會.
2003年8月26日係成為快意人的開始. 依然記得當日上午同會長傾過第一次電話, 互相介紹, 相約見面時間. 但因為工作關係, 直至3月14日先可以有機會出席活動. 就這一次的參予, 令我的生活起了點點的變化.
由細到大都好鍾意車, 但一個人揸住架車左兜右兜, 都真係幾無聊. 成為快意人之後, 先後認識咗Simon, Gary, 細威, Rikki, Mike Mike, Bobby, 呀德呀等等等等, 更認識了一班Alfa人, Lancia人, 一時之間覺得DAY OFF 喺香港的時間唔係好夠用. 平時唔多鍾意星期日放假, 因為好怕假日的香港人多車又多; 但依家個個月望住個ROSTER, 都會數數有幾多個星期日喺香港, 因為好希望可以出席每個星期日的早餐聚會, 可以同呢班快意人出車兜兜風, 快放一段; 又或者weekend 晚上相約飲飲嘢、吹吹水; 再不然一同通宵達旦地整車, 發現生活原來可以好寫意.
識到Simon, 俾我知道一個技術型的玩車人究竟係點的一回事, 擁有深厚的汽車機械常識, 並非車房師傅一般的經驗之談, 獲益不淺. Gary嘛, 簡直就係一個人生的模仿對象, 我認為係成功人士的例子! 喺Gary身上又認識到不同專業的人, 品嚐到不同的美食, 嚐試到另一種的生活模式. 細威同自己都揸 MK2 的 PUNTO, 年紀又差不多, 所以邊個話後生仔唔識快意! Rikki 重得意, 我同女朋友最初以為佢係警察, 當然依家知道佢唔係啦! 一個會飛車的爸爸, 令我想起讀書時呀爸朝朝開160km/h 車返學的日子.
仲有好多的難忘經歷, 仲有好多好多難忘的人和事, 我覺得,快意俱樂部最寶貴的就係呢班快意人. 眼見香港近幾年出現了大量的車會, 甚麼sunny 會呀, astina 會呀咁, 但一兩次聚會後就消聲匿跡. 雖然今日的快意聚會已經不是清一色的快意汽車, 但最可貴的就係大家都沒有忘記自己曾經係快意人, 係快意俱樂部的一份子, 仍然關心快意汽車的一舉一動, 互相支持、支援同故勵, 所以先有一個接一個的車會活動. 我想, 叫這班快意人為「高質數的車友」亦不為過!
所以,
我認為今次買快意 Punto, 根本就唔只係買咗架車咁簡單!
先認識到一班會欣賞意大行車的朋友, 由此開始不斷擴大自己的接觸面、生活圈子,
更而提升自己的生活質素以及生活模式. 從來都沒有想過,
小小的一部快意, 可以提供到這樣的一種生活空間.
因此我大膽地認為, 要欣嘗快意,
不單只從汽車實體中去看, 更可以從《快意生活空間》去看.
我認為擁有快意的價值莫過於此!
相信未來, 我仍會繼續去開我的Punto, 繼續去享受作為快意人的生活. 但作為快意人, 仍有一點點的遺憾, 就是新一代的快意再無機會踏足香港! 眼見亞洲很多地區仍有新款快意出售, 而自命有品味的香港人竟容不下一個快意. 究竟真是快意車本身出了問題呢? 還是香港人唯名牌是命, 令自己的選擇少了又少? 之前有傳言話快意會再次登陸, 確實令我感到興奮. 但又一次好夢成空, 唯有繼續靠快意俱樂部, 去廷續快意汽車的價值!
Arvin