車價：我認為Coupe的價值並不只在於他現在的狀態，最值錢的，是他曾作出的保養和維修。正廠零件加正廠手法維修，緊傎的保養，可令Coupe長命百歲、終生美麗。
意大利車眾所周知係易壞。[係呀係呀，好易壞架。] 人講佢又講！我地要知點解壞，點解仲係壞。
先探討一下，點解意大利車易壞。關鍵係零件和設計。
零件壽命較短
因為車上所用的橡膠不耐用，如水喉，塵冚很早脆化，導致漏水。內籠啲膠，中央台、門板之類又因為焗住俾太陽晒易脆又變形縮水或者溶鬼埋。潤滑劑在香港熱氣候又易溶化，門呀窗呀行吓行吓就易卡住。
設計好睇唔好位
個外表就一定無得頂，內籠設備擺位又別有心思。本來都幾無敵法垃利，衰就衰在佢唔好整！本來壞咪整囉，爛咪換囉；點知一啲易壞嘅部份就唔係收收埋埋就有嘢頂鬼住；要換嘅零件又唔夠位出又唔夠位入。總之要用好多時間小心整。但係，整車嘅人都要開飯架！整一架意大利車可以整五六架Civic，唔通整少少 嘢收你幾千錢咩。收得貴無下次，整得耐無下次，整唔到無下次。點算呀？
好啦，零件又易壞，壞咗又無人想整，決定整啦又要比人劏，肯比人劏完仲要等零件，一等就兩星期。唔好彩嘅，第二件零件又壞...週而復始，循環不息的宇宙...
須然易壞，但有幾何你見到意大利車生銹，穿底，積木車，更加唔會有人偷。
我們的快意俱樂部就是針對這兩個關鍵，找到平平地零件佬、又有零件書、又有維修書、又找到地大物博的大昌港龍維修中心、又有乜都肯整豐盛汽車服務中心；正所謂，大有大做，細有細做 ，唔鐘意又可以唔做。可以話解決了無人無件孤兒仔的狀况。
16v turbo 和 20v turbo 的Coupe當年新車價平均$320,000，看看它的折舊率，
牌費: $5794
轉名: $1000
燕梳:
RP Insurance Clarence Lam有如下報價，可以試吓揾揾佢 電話： 31064881或 rp_insurance@yahoo.com.hk
0%NCB 2004年好似有啲乜鬼loading 可能要成$6000
20%NCB $2,900
30%NCB $2,500
40%NCB $2,150
50%NCB $1,820
60%NCB $1,400
維修費:
如已行駛50000km的套餐
16v turbo 要換cam帶、平衡帶、啤令、水泵、所有皮帶 人工三千幾，零件三千幾
20v 和 20v turbo 要換cam帶、啤令、水泵、所有皮帶，因要拆下引擎換，最好順便換埋極力子 人工五千幾，零件六千幾
如果最近一兩年轉手次數多，多數保養不足，要多點心機調理內息。
呔最緊要，唔好淨睇呔紋，問吓上次幾時換過，兩年未換過就必定要換
仲有乜嘢要知？
撞得要整兩三萬嘅Coupe無乜人想整，唔駛太擔心有大撞車
其他嘢可以一路揸一路整
情況分析：
假如你揸過幾年車，但係第一次出燕梳。唸住平平地買Coupe玩吓。
揀了一架95年 16v turbo 己行80000km $50000。牌費燕梳轉名，加埋成$13000。唸住賣的車多數最近無乜打理，你買了就一定要全套換油加檢查，火咀風格油格電油格、偈油軚油波箱油、水箱水迫力油，大約$3000。
到這地步第一個月，你已經預算了$66000去擁有一架可放心三個月內行得走得的Coupe。
那一次檢查完你一定有嘢要整，可以集中資源先整引擎：Cam帶、漏水、水温等。可預算用$6000在第三個月整一整架Coupe。第六個月又換油檢查多一次，大約$1000。檢查完，可以預$2000整。應可放心有三個月儲啲錢。坦白說，這半年的調理未可令Coupe回復昔日勇態，但任何十年車也不例外。
首年的開支會很大，但當了解了你的Coupe後，維修開支會逐步减少。
你又可以用 十年養車開支 推算你的Coupe開支。