回主頁

保養哲學

接觸多了不同國家製造的汽車，有着不同的個性，但...甚麼是個性呢？怎樣和維修扯上關係呢？

慢慢了解到一個模式，留意這些國家的文化，就可以發展一套適應不同國家車的維修方法。

日本車：日本橡膠優質，電子先進； 有齊製造可靠車嘅原料。但因為國家注重效率，所有機械設計以"啱啱好"就得為目的，所以車身金屬"啱啱夠"，無多餘嘅物料剩；結果車身較歐洲車單薄。

德國車：理論非常強勁，所以多創新科技 ；加上講求實際的德國人天生謹慎和紀律，由設計開始，設計師為周詳起見，設計了多些後補裝置或程式令系統可自行運作及處理錯誤；而工程師為安全起見，提高生產的零件壽命，盡量令零件不會在預算更換週期前損壞。結果，車身重了但每件零件壽命較預期為長；亦因此德國車很耐用。

英國車： 對生活極度講究，但思想傳统或叫做保守，不重視多向發展，但因為這對生活要求嘅執著，所以他們的汽車極有氣派，乘座感超級一絕！亦是英國車重點發展項目。英國的凍和乾燥令橡膠質素奇差，加上科技保守落後，令所生產嘅汽車不能與現今社會要求的"可靠"掛勾。

法國車：概念新頴加創意無限 - 大膽。但設計過度前衛，難令大部份人接受；國民的悠閒，產品測試未足便推出市場；結果令人驚喜令人失望。

意大利車：似乎意大利人太高傲了。他們的確有無邊嘅創意和細緻嘅美學觀念，可能設計師太着重美學，工程師又太自信高估了零件壽命；於是很多零件在預期前便壞或爛，很多時小小零件壞，車便要停下來。結果，好睇唔好使。

以上的車，各有長短，但似乎英國，意大利和法國車極不受香港人投入。點解呢？

香港人：慣於走精面，貪快，喜歡博一博無頻撲。於是需要常常檢查，需要耐性，需要容忍嘅車，便令 香港人發火。而這些正是英國，意大利和法國車需要的。

----------------入正題--------------

要保養我們嘅愛車就要由生產她們的國民特性着手，即上文所述。我便針對其弱點而苦思了一套保養哲學，令她可以提高使用次數和行駛里數的成本效益。

這一套保養哲學就是揉合了膚淺的我對中醫固本培元醫學方向和出自[左傳]內有備無患嘅成語而依據李時珍《本草綱目》嘅精神，而演化出來，加上用中文寫，希望較易由中國人去理解。

固本培元

我對固本培元嘅理解係以延緩老化、增進健康長壽為目的。以平時依時保養檢查，定期更換損耗性物料 (即偈油、迫力油、迫力皮、極力子、呔等等)，用可靠有知名度嘅物料 (例如原裝零件、Ferodo、Mobil、Bridgestone、BOSCH等)，切勿貪平用次貨、用過期鷹粟粉或貪快用不正確手法維修；以致早衰折壽、跪低、扭偈....。 如此就可以減少意大利引擎出現問題嘅機會。

簡單而言：唔好慳，唔好搏。

有備無患

左傳內成語由來，魏絳對著悼公勸諫說﹕【大王，我們應該居安思危，思則有備，有備則無患。】

又點樣有備無患呢？車 - 係由幾萬件零件，幾千個生產步驟，幾百個零件供應商，幾十種系統，幾個上手車主，而到現在得一個人去俾錢去補償番之前所有可能出現嘅錯誤。所以，車 - 係一定會壞！並且一個人唔會有可能令架車十全十美，百戰百勝，千秋萬世。

好喇，咁點算呢？有備無患！準備好零件，準備整車嘅人，準備好啲錢，架車一出事咪攞去整。準備好哂時，架車一出事你又知攞去邊個度診斷，診斷咗又知攞去邊個度整，整嗰陣又有零件換，整好咗你又有錢俾。養車一條龍運作模式！

《本草綱目》

係李時珍研究自然界中的各種無機物與動、植物嘅科學報告。我唔係唸住叫你地攞啲山草藥撻落塊凹咗嘅沙板度，亦唔係唸住叫你地將啲大山地、指天椒、鹿尾巴加七碗水煲成三碗倒入個油缸裡面；而係想以佢寫《本草綱目》嘅科學精神提供你們最有用嘅資料去養車。

咁究竟係乜鬼精神呢？就係李時珍自己說的「通考據」、「詢野人」；一種實事求是的精神。

「通考據」的意思就是，通過對文獻的校正、考據、整理，糾正過去的錯誤，尋求正確的知識；至於所謂的「詢野人」，包括了：社會調查、實地實物考察、以及自身的經驗。

在快意Coupe維修手冊和我收藏了的一些汽車書籍中，有很多不同嘅方法去維修和有很多特別嘅物料規格要求；細心閱讀是不難找出最好的和最適合香港氣侯嘅配搭。

因工作關係接觸汽車維修界的人物和事物較多和互聯網發達嘅原因，令事件調查和收集經驗得以快速和準確。

於是找到結果例如以下：

地球上最好偈油Oberon F333

最好迫力油Castrol SRF

Coupe上最令我滿意嘅呔喺石橋RE-01。

Coupe必壞嘅係水箱風扇Relay座和極力子分泵

電池兩年必須更換

谷車時火咀最好係NGK7或8度

架車保養得好，就可以成日欣賞馬力